Comunicado nº 25. A INFÂMIA DA BURGUESIA. OS RICOS TAMBÉM “CHORAM”

Padrão

A INFÂMIA DA BURGUESIA. OS RICOS TAMBÉM “CHORAM”

A burguesia como classe social carece de pudor e de escrúpulos. A burguesia galega nom é umha excepçom.

Enquanto mais de 250 mil galegas e galegos padecem o desemprego, enquanto vários centos de milhares mais vivem com salários de miséria, padecendo contratos eventuais, sem direitos laborais.

Enquanto cada ano mais de 15 mil jovens tenhem que abandonar a Galiza procurando o seu futuro. 

Enquanto centenares de milhares de reformad@s sobrevivem com reformas miseráveis.
Enquanto mais de 20% da populaçom galega vive por baixo do umbral da pobreza.

Enquanto aplicam políticas ultraliberais que privatizam e precarizam a saúde e a educaçom, convertendo um direito num negócio.

Enquanto os seus partidos aprovam nas suas instituiçons legislaçons contra a nossa classe em matéria laboral, restringindo ainda mais as raquíticas liberdades e realizando contínuas mudanças do Código Penal para censurar e reprimir mais e melhor a nossa luita … a família do maior oligarca deste País divulga um “flashmob” com a celebraçom surpresa de aniversário.

Um vídeo infame e repugnante ao mais puro estilo hollywoodense, pura apologia de como mediante a exploraçom da classe operária galega, de mulheres nas suas casas, de crianças em países asiáticos e de muitos outros lugares do mundo, se levanta um impêrio, o de Zara-Inditex, com um património superior ao do governinho de Feijó.

Estamos governados por bandidos, piratas e criminais, por umha burguesia sem escrúpulos, que nom duvida em divulgar a sua vida de luxo e esbanjamento enquanto a classe trabalhadora, o povo trabalhador e empobrecido da Galiza padecemos cortes, austeridade, restriçons, desemprego, precariedade, emigraçom, pobreza.

Estamos convencid@s que nengum dos partidos da “esquerda” institucional nada dirá. O seu silêncio perante o senhor de Arteixo é todo umha declaraçom de princípios do que nom som e do que nunca farám. Estám mais preocupados com ganhar eleiçons para logo legislar as políticas da burguesia.

A rebeliom popular é a única via para mudar isto. Mas a revoluçom nom aparece de forma espontánea. Há que organizá-la e prepará-la. Este é o caminho a seguir para evitar que nom só nos explorem, empobrezam, reprimam … para evitar que se riam de nós.

A esquerda revolucionária galega nada temos que celebrar!!

Na Pátria, 29 de abril de 2016

Direçom Nacional de Agora Galiza

http://www.lavozdegalicia.es/video/gente/2016/04/29/flashmob-hizo-llorar-amancio-ortega/0031_2016044869877802001.htm