Comunicado nº 60: Ence-Elnosa fora da ria de Ponte Vedra e da Galiza!

Padrão

 

Ence-Elnosa fora da ria de Ponte Vedra e da Galiza!

O complexo de Ence-Elnosa é o melhor paradigma do rol que a Galiza tem asignado polo imperialismo na divisom internacional do trabalho.

Para a UE e para Espanha a nosso país simplesmente é umha “regiom” onde instalar indústrias de enclave, portanto mui contaminantes e com o ciclo produtivo incompleto.

Assim a Galiza, ano após ano, caminha a converter-se num enorme eucaliptal para alimentar os dous monstros instalados no nosso território nacional: na ria de Ponte Vedra e em Návia, na comarca nororiental do Návia-Eu.

A fábrica do Louriçam foi imposta manu militari em 1956 frente à oposiçom popular quando o franquista Filgueira Valverde era presidente da Cámara de Ponte Vedra.

Ence leva pois mais de seis décadas provocando a destruiçom da ria, ameaçando a saúde e a segurança da populaçom de Marim e Ponte Vedra, gerando um impacto ambiental letal para a biodiversidade do que foi um paraíso natural, impossibilitando o desenvolvimento económico da comarca.

O complexo privatizado a início da década de 90 está atualmente em maos da oligarquia espanhola vinculada com o PP, facto que lhe permite incumprir boa parte das normativas medioambientais, lograr constantes prórrogas para a sua permanência na ria mediante a concesom de autorizaçons ambientais ilegais feitas à medida desta empresas poluente.

Perante este cenário segue sendo imprescindível a resistência e a luita popular para erradicar Ence de Ponte Vedra, para evitar mais agressons por parte dos planos predadores do capitalismo espanhol.

A esquerda independentista e socialista galega defende o integral desmantelamento deste complexo industrial contaminante, mas também a implementaçom e desenvolvimento dum plano de reindustrializaçom para a comarca, compatível com o respeito ambiental e que permita a recolocaçom dos quadros de pessoal de ENCE e ElNOSA.

Porém, somos conscientes que a luita por umha Pátria ecologicamente sustentável, respeituosa com a nossa riqueza, que free a degradaçom do País dos mil rios, deve enquadrar-se numha estratégia visada para a recuperaçom da independência e a soberania nacional.

Sem superarmos o quadro autonómico que permite o expólio dos recursos da Galiza e a sobre-exploraçom do povo trabalhador galego por Bruxelas e Madrid, nom lograremos acabar com as permanentes agressons ambientais que padecemos.

Mas também sem quebrarmos com a lógica destruidora e esbanjadora do capitalismo na sua fase mais avançada, nom será possível construirmos umha Galiza sem exploraçom e com justiça social.

A equaçom Independência-Socialismo deve ser o eixo estratégico do movimento popular que reclama e luita com persistência por umha Pátria sem contaminaçom.

Agora Galiza apoia a Marcha contra o complexo Ence-Elnosa que sábado 3 de junho partirá às 19.30h das alamedas de Ponte Vedra e Marim.

Espanha é a nossa ruína!

Desmantelamento de Ence-Elnosa!

A luita é o único caminho!

Direçom Nacional de Agora Galiza

Galiza, 24 de maio de 2017