Agora Galiza foi fundada na tarde de 4 de julho de 2015 na capital da Galiza.

Nasce promovida por um conjunto de ex-militantes e dirigentes da esquerda independentista galega contrários à dissoluçom de NÓS-UP, e de ativistas sociais até esse momento sem enquadramento político.

Agora Galiza, como organizaçom socialista e feminista galega de libertaçom nacional, visa achegar à esquerda independentista um instrumento nacional de luita e intervençom de caráter plural, com vocaçom de massas e sob o modelo organizativo de unidade popular.

Agora Galiza tem vontade de ser umha ferramenta política patriótica, socialista e feminista ao serviço da Galiza, do povo trabalhador e dos setores empobrecidos e excluidos.

Constituimo-nos com a firme vontade de contribuir modestamente à recomposiçom integral do campo da esquerda patriótica. Objetivo urgente e imprescindível para evitar a espanholizaçom do movimento popular e enquadrar a mudança social que reclama a maioria do nosso povo no seio da rutura democrática com o regime espanhol que permita abrir um processo constituinte galego face umha nova sociedade com justiça social numha Galiza soberana.

Após participarmos 25 de Julho na manifestaçom unitária do Dia da Pátria, e de organizarmos em Vigo a homenagem a Moncho Reboiras polo 40 aniversário do seu assassinato, Agora Galiza está centrada no processo constituinte que culminará no primeiro trimestre de 2016 com a convocatória da I Assembleia Nacional onde aprovaremos o modelo organizativo, o corpus político e ideológico tático e estratégico.

As nossas portas estám plenamente abertas a todas aquelas mulheres e homens que queiram contribuir de forma generosa e altruista a comprometer-se desde cada umha das suas realidades sociais e locais, de forma organizada e com visom nacional, com diversos graus e ritmos de implicaçom, na luita pola independência da Galiza e a construçom de umha sociedade socialista superadora do patriarcado.