Nem tortura animal, nem colonialismo cultural

Touradas fora de Ponte Vedra

Mais um ano haverá touradas em Ponte Vedra. Já nom há na Corunha, nem em Sárria nem em Padrom como em anos anteriores, mas sim em Ponte Vedra governada polo BNG.

O lobby taurino vai recuando por todo o País, fai desesperadas tentativas para manter o espectáculo da barbárie e a tortura. Despejado o cacique Louzán da Deputaçom de Ponte Vedra, perdeu umha das últimas fontes de financiamento público para o seu ruinoso negócio.

E mais um ano haverá touradas em Ponte Vedra. A empresa que gere a praça de touros contará com 38.000 euros do concelho “nacionalista” de Ponte Vedra, dis que em troca de empregar esse recinto durante a feira franca medieval. Como se nom houvesse outros recintos… E ainda que nom os houvesse.

Até a legislatura passada, outro “nacionalista” pertencente a umha “peña” taurina fazia parte do governo municipal de Lores. A pressom e o escándalo forçárom a saída da equipa governate desse nacionalista… espanhol.

A início da presente legislatura municipal a marea de Ponte Vedra solicitou a retirada do convénio que sostém a empresa que mantém a praça de touros. O BNG ficou retratado, votando com o apoio do PP, por continuar a dar oxigénio à moribunda pervivência das touradas na Galiza.

Quantos mais anos durarám as touradas em Ponte Vedra?

Agora sabemos em que se baseava a campanha eleitoral que comparava o “Lorix” com o gaulés Asterix. Lorix defende agora e sempre a pervivência das touradas na Galiza.

Agora Galiza solicita à equipa de governo municipal de Ponte Vedra anulaçom de qualquer colaboraçom económica com as touradas e a declaraçom de Ponte Vedra como Concelho livre de touradas e qualquer outra forma de tortura animal.

Direçom Nacional de Agora Galiza

Na Pátria, 9 de agosto de 2016