Agora Galiza apela à comunidade galega residente na Venezuela e a quem regressou à Galiza a votar nas candidaturas bolivarianas e chavistas.

A Venezuela leva padecendo umha permanente agressom promovida polos Estados Unidos visando provocar o fracasso da Revoluçom Bolivariana. O império pretende apoderar-se novamente das imensas reservas de petróleo e gás da Pátria de Chávez e Bolívar.

As eleiçons do vindouro 6 de dezembro som vitais para consolidar o processo revolucionário, e portanto para garantir as conquistas sociais e laborais do povo trabalhador venezuelano, a soberania e a independência nacional, a integraçom latinoamericana e caribenha, que progressivamente a Venezuela tem atingido com a posta em andamento do processo revolucionário bolivariano iniciado em 1999.

O imperialismo ianque quer recuperar a toda custa o terreno perdido na América Latina na última década. Mediante diversas formas de golpes de estado tem tombado os governos progressistas das Honduras e do Paraguai, e umha importante vitória na Argentina com a recente eleiçom de Mauricio Macri como novo presidente da Pátria do Che.

Utiliza e utilizará todas as ferramentas possíveis para que a República Bolivariana seja novamente um neocolónia de Washington. Para lográ-lo conta com a colaboraçom da burguesia apátrida, da direita venezuelana situada em posiçons ultras, que nunca reconhceu a legitimidade democrática dos governos de Hugo Chávez e Nicolás Maduro. E que agora em plena campanha eleitoral está gerando umha atmósfera para nom reconhecer os resultados de 6 de dezembro se nom som favoráveis aos interesses da oligarquia.

A complexa situaçom económica que padece hoje a Venezuela como consequência das estratégias desestabilizadoras de boicotagem, contrabando e acaparamento que provocam desabastecimento de produtos básicos, cortes de energia, elevada inflaçom, dolarizaçom da economia, unido à insegurança gerada pola açom combinada do paramilitarismo e as bandas de delinquentes, pretendem criar um clima de desafetaçom do povo pobre e do povo trabalhador com o Governo bolivariano.

Mas a soluçom aos enormes reptos e desafios que hoje ameaçam a continuidade da Revoluçom Bolivariana só tenhem soluçom na aprofundizaçom e radicalizaçom do processo revolucionário rumo ao Socialismo.

Agora Galiza apela à comunidade galega que reside na Venezuela, e à emigraçom galega com nacionalidade venezuelana que voltou para a Galiza, votar n@s candidat@s do Grande Pólo Patriótico nas eleiçons de 6 de dezembro.

Dezenas de millares de galegas e galegos, a Naçom Galega no seu conjunto, tem umha dívida histórica com o povo e a naçom venezuelana que nos acolheu quando nos refugiámos escapando da pobreza, da miséria e da repressom franquista.

Chegou o momento de devolver tanta generosidade com o nosso povo. Amor com amor se paga!

Direçom Nacional de Agora Galiza

Na Pátria, 26 de novembro de 2015